مزیدار ذائقوں کا سفر

السلام و علیکم!

میں سارہ عثمان جامعہ کراچی بی ایس سال اول کی طالبہ ہوں۔ شعبہ اسلامی تاریخ سے ہوں۔

 

"بات ھوجب کھانے کی تو کھانےکے دیوانے کہتےہیں کہ پہلے پیٹ پوجا پھر کوئی کام دوجا"

 

کراچی کو پاکستان کا تفریحی مرکز کہتے ہیں ، اور یہ روشنیوں کے شہر سے جانا جاتا ہے۔ کراچی ایک ایسا شہر ہے جہاں کروڑوں لوگ بستے ہیں۔ یہ شہراپنی  رنگینیوں اور روشنیوں کی وجہ سے لوگوں کو اپنی طرف کھینچتا ہے۔ کراچی تفریحی سرگرمیوں میں سب سے آگے آگے ہے۔ کراچی میں لوگوں کی سب سے پسندیدہ سرگرمی مختلف قسم کے نت نئے مزےدارکھانوں کی جگہیں دریافت کرنا اور وہاں جا کر ان کھانوں سے لطف اندوز ہونا ہے۔ لوگ اپنے دوستوں، اہل خانہ، اور رشتے داروں کے ساتھ  مل کر کھانا کھانے جاتے ہیں۔ نئے نئے کھانوں کا مزہ لیتے ہیں۔ کراچی میں ان کھانوں کے فروغ کیلئے فوڈ اسٹریٹس اہم کردار ادا کرتی ہیں اسلئے یہ فوڈ اسٹریٹس قائم کی گئی ہیں۔ اور یہ فوڈ اسٹریٹس تفریح کے ساتھ ساتھ معاشی استحکام میں بھی مدد گار ثابت ہوتی ہیں۔

چند مقبول فوڈ اسٹریٹس جو پورے پاکستان میں مشہور ہیں۔

بوٹ بیسن فوڈ اسٹریٹ:

بوٹ بیسن کلفٹن کراچی میں واقع ہے۔ یہ ایک لمبی فوڈ اسٹریٹ ہے جہاں بہت سارے ریسٹورنٹس بنے ہوئے ہیں۔ لانگ ڈرائیو کے شوقین اکثر یہاں کھانا کھانے اور ناشتہ کرنے آتے ہیں۔ یہ ریسٹورنٹس صبح پانچ بجے سے لے کر رات دیر تک کھلے رہتے ہیں۔ لوگوں کی ایک بڑی تعداد یہاں روز آتی ہے۔ اگر آپ یہاں جائیں تو ہوٹل ڈیرا پر ناشتہ ضرور کیجئے گا۔ حلوہ پوری، چائے پراٹھے، چھولوں کا سالن، آلو کی ترکاری، سنہرا سا املیٹ ہر طرح کا مزے دار ناشتہ موجود ہے۔

اسکے ساتھ ہی بنس روڈ کی فوڈ اسٹریٹ بھی اپنے کھانوں کیلئے بہت مقبول ہے۔

برنس روڈ فوڈ اسٹریٹ:

برنس روڈ کراچی کی سب سے پرانی اور مشہور فوڈ اسٹریٹ ہے۔ یہاں ان گنت ریسٹورنٹس اور کھانوں کی دکانیں موجود ہیں۔ لوگوں کا ایک ہجوم رات کے وقت یہاں زیادہ نظرآتا ہے۔ نلی بریانی، پلاؤ، نہاری، پائے، قورمہ، مٹن کڑاہی، چکن تکہ، سیخ بوٹی،بہاری کباب فش فرائی اور دیگر کھانے بھی موجود ہیں۔ لیکن یہاں کا مزےدار حلیم اور بریانی کی بات ہی الگ ہے۔ اگر آپ یہاں جائیں تو یہ دونوں چیزیں تو ضرور منگوائیں۔

حسین آباد فوڈ اسٹریٹ:

حسین آباد فوڈ اسٹریٹ میں 100 سے زائد کھانے پینے کی دکانیں اور ریسٹورنٹس موجود ہیں۔ یہاں فاسٹ فوڈ، چائنیز، اور ہر طرح کے دیسی کھانے فروخت کئے جاتے ہیں۔ یہاں چیزیں بہت ہی معیاری اور مناسب قیمت میں دستیاب ہیں۔ اسیلئے لوگ یہاں آنا پسند کرتے ہیں۔ یہاں کا کھاؤسہ، مٹکا فرائز، بن کباب، کارن ڈاگ، وفل، گولا گنڈا، چکن چرغہ اور یہاں کی خاص کوئلہ کڑاہی کھانے لوگ دور دور سے آتے ہیں۔اور اسکےعلاوہ بھی دیگر مزےدار کھانے موجود ہیں۔

دو دریا فوڈ اسٹریٹ

اب بات کرتے ھیں اپنی اگلی فوڈ ڈیسٹینیشن دودریا کی جہاں کھانوں کے ساتھ آپ کو ملتا ہے خوبصورت ٹھاٹھے مارتےسمندرکا حسین نظارہ جہاں آپ لطف اندوز ہو سکتے ھیں مختلف قسم کے سی فوڈ سےجن میں مختلف قسم کی مچھلیوں کے علاوہ جھینگے اور کیکڑے وغیرہ بھی شامل ہیں جو یہاں بہت مقبول ہے اسکے علاوہ ایک اور فوڈ اسٹریٹ جسے لوگ پورٹ گرینڈ کے نام سے جانتے ہیں۔

پورٹ گرینڈ فوڈ اسٹریٹ:

پورٹ گرینڈ جدید طرز پہ بنی خوبصورت فوڈ اسٹریٹ ہے جہاں سمندر کا نظارہ نہایت ہی دلکش ہے یہاں مختلف قسم کے ریسٹورنٹس واقع ہیں جہاں ہر طرح کے دیسی اور غیر ملکی کھانے دستیاب ہیں۔ اس کے علاوہ بھی بہت سی تفریحی چیزیں موجود ہیں۔ خریداری کی چیزوں کے اسٹالز، بچوں کے جھولےاور مختلف قسم کی سرگرمیاں موجود ہیں۔ اس ہی کے ساتھ اور بھی بہت ہی مزےدار کھانوں کی فوڈ اسٹریٹس ہیں۔ سکندرآباد فوڈ اسٹریٹ، پی.آئی.بی فوڈ اسٹریٹ، دہراجی فوڈ اسٹریٹ، کھارا در فوڈ سٹریٹ، ڈی ایچ اے فوڈ اسٹریٹ، لیاقت آباد فوڈ اسٹریٹ۔

تو یہ تھا مختصر سا احوال چند مشہور فوڈ اسٹریٹس کا اصل مزہ تو تب ہے جب آپ خود یہاں آکر ان جگہوں کا دورہ کر کے ان کھانوں سے لطف اندوز ہوں گے۔ تو آپ یہاں جب بھی آئیں تو ان فوڈ اسٹریٹس کا دورہ ضرور کیجئے گا۔ ان کھانوں کو کھا کرآپکو نہ صرف یہاں کے کھانوں سے بلکہ کراچی سے بھی ہوجائے گا پیار۔ کیونکہ اصل مزہ اور اپناپن تو یہاں کے کھانوں میں ہی ہے۔